Bütün dünyada ən qədim və məşhur brendlərdən biri olan “Bernardaud” lüks kateqoriyalı elit çini məhsulların istehsalı ilə məşğuldur. Brendin istifadə etdiyi çini material “kaolin” adlanan ağ gildən, eləcə də kvars və şpat minerallarından ibarətdir. Kaolin gili Fransanın Limoj əyalətində hasil edilir və buna görə də Limoj çini adlandırılır. Kaolin gili çini materialı möhkəmləndirərək ona qüsursuz ağ rəng verir, kvars mineralı isə çini materiala unikal parıltı və şəffaflıq əlavə edir. “Bernardaud” brendinin restoranlar üçün nəzərdə tutulmuş çini qab-qacaq məhsullarına dünyanın ən təmtəraqlı və dəbdəbəli restoran və otellərində rast gəlmək olar. Məsələn, dünyaca məşhur otel şəbəkələri – “Ritz”, “Carlton” və “Four Seasons”, o cümlədən Parisin ən dəbli və bahalı mehmanxanalarından biri - “Kost” (“Hotel Costes”) oteli məhz “Bernardaud” brendinin çini qab-qacağından istifadə edir.

Yarım əsrdən artıqdır ki, “Bernardaud” brendi istedadlı rəssamları əməkdaşlığa dəvət edir və nəticədə istedad, coşqun həvəs, ciddi konsepsiya və kollektiv yaradıcılıq ruhu çininin yeni formalarında özünü büruzə verir.

“Bernardaud” brendi ilə əməkdaşlıq edən dünyaca məşhur simalar arasında rəssamlar Kis Van Donqen və Bernard Bufet, eləcə də Sezar və Roy Lixtenşteyn, habelə tanınmış dizayner Raymond Loevi var. Çini məhsulun tarixində bu insanlardan hər birinin mühüm rolu olmuşdur.

Azərbaycan Rəssamlar İttifaqının üzvü olan Fərhad Fərzəliyev 2013-cü ildən etibarən “YAY” rəsm qalereyası və “YARAT” Müasir İncəsənət Məkanının müxtəlif layihələrində iştirak edir. O, instalyasiya, rəngkarlıq, fotoqrafiya, qrafika və musiqi ilə işləyir.

“ - Uğur arzuların reallığa çevrilməsinin sinonimidir və mən çox məmnunam ki, bir vaxt heyranı olduğum insanlar indi mənim yaxın dostlarıma çevriliblər. Hazırda mən bunu ən mühüm nailiyyətim hesab edirəm. Mənim üçün ən önəmlisi zaman çərçivəsi və digər məhdudiyyətlər olmadan yaratmaqdır”.