BrendLalique

Fransız şüşə istehsalçısı "Lalique" XIX əsrdən başlayaraq fransız lüksünün simvoludur. Dünyanın ən yaxşı dizaynerləri möhtəşəm heykəllər, heyranedici vazalar, heyrətamiz mebellər, ecazkar ətir şüşələri və qiymətli zinət əşyalarına bu brendin adı altında həyat verirlər. "Lalique" 1888-ci ildə tanınmış şüşə ustası və zərgər Rene Lalik tərəfindən təsis edilib. Karyerasına 16 yaşında zərgər şagirdi kimi başlamış Rene Lalik 1881-ci ildə bir çox tanınmış Paris zərgərləri üçün dizaynlar hazırlamaqla məşğul idi. O, 1885-ci ildə Parisdə Qayon meydanında Jül Destapın keçmiş emalatxanasında öz emalatxanasını açdı. Lalik 1887-ci ildə 4 Sentyabr küçəsində biznes açdı və növbəti il "RL" brendini qeydiyyatdan keçirdi. O, 1890-cı ildə Parisin Opera rayonunda mağaza açdı. Rene Lalik on ilin içində Parisin ən məşhur zərgərləri arasında yer ala bildi. Lalik 1905-ci ildə Vandom meydanında, məşhur ətriyyatçı Fransua Kotinin mağazasının yaxınlığında təkcə zinət əşyalarını deyil, şüşədən hazırlanmış məhsulları da nümayiş etdirən yeni mağaza açdı. O, 1907-ci ildə "Coty" üçün ornamentli ətir şüşələri istehsal etməyə başladı. Şüşə predmetlərin istehsalı 1902-ci ildə onun kənd villasında başladı və ən az 1912-ci ilə qədər burada davam etdi. Lalikin ilk şüşə zavodu 1909-cu ildə Komb-la-Vildə icarəyə götürülmüş obyektdə açıldı, Rene bu obyekti 1910-cu ildə satın aldı. O, 1912-ci ilin dekabrında Vandom meydanında yerləşən mağazasında "Lalique" şüşə məhsullarının sərgisini keçirdi. Onun şüşə fabrikləri Birinci Dünya Müharibəsi illərində hərbi əməliyyatları dəstəkləmək üçün adi əşyalar istehsal edirdi. 1919-cu ildə Vingen-sur-Moderdə 1921-ci ildə açılan yeni istehsal müəssisəsinin tikinti işləri başladı. Lalik 1925-1931-ci illərdə avtomobil kapotları üçün 29 istehsalçı nişanı istehsal etdi; ilk dəfə 1920-ci ildə istehsal edilən su pərisi heykəlciyi də sonradan istehsalçı nişanı kimi satıldı. O, 1920-1930-cu illərdə dünyanın ən məşhur şüşə istehsalçıları arasında yer alırdı. Rene Lalik 1945-ci ildə vəfat etdi. Oğlu Mark Lalik biznesin başına keçib əvvəlcə "M.Lalique", daha sonra isə "Cristal Lalique" adı altında fəaliyyət göstərməyə başladı. Markın rəhbərliyi altında şirkət məşhur "Lalique" şüşəsinin istehsalından büllur kimi tanınan qurğuşun şüşəsinin istehsalına keçdi. ""Lalique"" brendi yarandığı gündən 1900-1910-cu illərə qədər Fransanın ən qabaqcıl modern zərgərlik dizaynerlərindən biri idi. XX əsrin ilk iki onilliyində ""Lalique"" dünyanın nəcib şüşə əşyaların istehsalı ilə məşğul olan ən məşhur brendlərindən birinə çevrildi. Lalik XIX əsrin birinci yarısında ətir şüşələri, vazalar, istehsalçı nişanları və mürəkkəb qabları, kitab altlıqları və press-papye kimi dekorativ şüşə məhsulların istehsalı ilə məşğul olurdu. Lalikin əsərləri arasında şüşə ornamentlərin geniş istifadə edildiyi bir neçə interyerin dizaynı belə var idi: ""SS Paris"", ""SS Ile de France"", ""SS Normandie"", Şərq Ekspress qatarının vaqonları, ""Peace Hotel"" (Şanxay), ""Oviatt Building"" (Los-Anceles) və Müqəddəs Marfey Kilsəsi (Cersi). ""Lalique"" brendinin kolleksiyalarını dünyanın bir çox muzeylərində tapmaq mümkündür. Zərgərlik tarixində Lalikin adı Faberje, Kartye və Tiffani ilə eyni sıralarda çəkilir. Hətta rus imperatriçəsi Aleksandra Fedorovna və əfsanəvi Sara Bernar belə ""Lalique"" brendinin əşyalarını toplayırdı. ""Lalique"" brendinin məhsulları krallar, kolleksiyaçılar və prezidentlər, eləcə də Elton Con, Şirli Cons və Cennifer Lou Hyuitt kimi məşhurlar tərəfindən sevilib seçilirdi."